NOVELETA, Cavite — Umani ng papuri at iba’t ibang reaksyon online ang isang residente ng Barangay San Antonio I matapos gumawa ng pansamantalang flood barrier upang mapigilan ang pagpasok ng baha sa kanilang tahanan habang patuloy na pinalalakas ng Habagat ang pag-ulan sa lalawigan.
Sa video na ibinahagi ni King Nazareth Dayao Co’Arle, makikita ang improvised flood-control setup na matagumpay na humarang sa tubig-baha mula sa umaapaw na Ilog Ylang-Ylang at nakatulong upang hindi mapasok ng baha ang kanilang bakuran.
Dahil sa viral na video, maraming netizens ang nagpahayag ng paghanga sa pagiging madiskarte at matatag ng residente sa harap ng kalamidad. May ilan namang nagpahayag ng pagkadismaya sa patuloy na suliranin sa pagbaha sa lalawigan.
Kabilang ang Noveleta sa mga lugar sa Cavite na naapektuhan ng pagbaha nitong mga nakalipas na araw, kasama ang ilang bayan sa Unang Distrito, gayundin ang mga lungsod ng Imus at Bacoor. Sa ilang komunidad, umabot mula tuhod hanggang halos tao ang taas ng tubig-baha.
Matagal nang nakararanas ng pagbaha ang mga mabababang lugar sa Cavite, lalo na tuwing malalakas at tuloy-tuloy ang pag-ulan. Ayon sa mga residente, mabilis na tumataas ang tubig sa ilang lugar dahil sa pag-apaw ng mga ilog at pagdaloy ng tubig mula sa matataas na bahagi ng lalawigan.
Muling binuhay ng insidente ang panawagan para sa mas epektibo at pangmatagalang flood-control projects sa Cavite, kasabay ng patuloy na pag-unlad at pagdami ng imprastraktura sa lalawigan. #RPB
Source: DAILY TRIBUNE
Discover more from Rexpress Balita
Subscribe to get the latest posts sent to your email.
Leave a Reply