Waste-to-Energy at Nuclear Power, Isinusulong ng Gobyerno para Palakasin ang Suplay ng Kuryente

MANILA — Mas pinaigting ng pamahalaan ang pagsusulong ng waste-to-energy (WTE) at nuclear energy programs bilang bahagi ng hakbang upang mapalakas ang suplay ng kuryente sa bansa at matugunan ang lumalaking hamon sa pamamahala ng basura.

Ayon sa Department of Energy (DOE), nakatakdang magsagawa ng special auction sa Oktubre 13 para sa mga proyektong waste-to-energy sa ilalim ng Green Energy Auction (GEA) Program. Aabot sa 400 megawatts (MW) ng bagong kapasidad ng kuryente ang target na makuha mula sa naturang teknolohiya.

Inaasahang makukumpleto ang mga nanalong proyekto bago matapos ang 2028 at magsisimulang maghatid ng kuryente sa power grid pagsapit ng katapusan ng 2029.

Sinabi ni Energy Secretary Sharon Garin na mahalagang bahagi ng programa ang direktiba ni Pangulong Ferdinand R. Marcos Jr. na magkaroon ng mas epektibong solusyon sa problema ng basura habang pinapalawak ang mga alternatibong pinagkukunan ng enerhiya.

Ayon sa DOE, umaabot sa humigit-kumulang 9,000 metriko toneladang basura ang nalilikha araw-araw sa Metro Manila. Tinatayang maaari itong makalikha ng hanggang 200 MW ng kuryente kung mapoproseso sa pamamagitan ng mga waste-to-energy facility.

Gayunman, nilinaw ng ahensya na hindi papalitan ng WTE program ang mga umiiral na hakbang tulad ng waste reduction, segregation, recycling, at material recovery. Tanging mga natitirang basurang hindi na maaaring i-recycle o muling gamitin ang maaaring gawing fuel para sa mga planta.

“Ang mga basurang hindi na maaaring mapakinabangan ay hindi dapat basta mapunta sa mga landfill o daluyan ng tubig. Sa ilalim ng mahigpit na pamantayang pangkalikasan, maaari itong gawing enerhiya na makatutulong sa ating suplay ng kuryente,” ayon kay Garin.

Samantala, iniulat din ng DOE na patuloy ang pag-unlad ng nuclear energy program ng bansa sa larangan ng polisiya, regulasyon, internasyonal na kooperasyon, paghahanda sa pagpopondo, at pagbuo ng kinakailangang imprastraktura.

Sa kanyang ikalimang State of the Nation Address (SONA), muling binigyang-diin ni Pangulong Marcos ang kahalagahan ng pag-aaral sa paggamit ng nuclear energy upang mapalakas ang lokal na produksyon ng kuryente at makatulong sa pagpapababa ng gastos sa enerhiya.

Ayon kay DOE Undersecretary Giovanni Carlo Bacordo, hindi lamang pagtatayo ng nuclear power plant ang kailangan kundi ang pagbuo rin ng matatag na regulatory system, teknikal na kakayahan, financing framework, at tiwala ng publiko.

Kinilala rin ng International Atomic Energy Agency (IAEA) ang naging progreso ng Pilipinas sa pagtugon sa mga rekomendasyon nito. Natapos na ng bansa ang Phase 1 ng IAEA Milestones Approach at naghahanda na para sa Phase 2, na nakatuon sa pagpapaunlad ng imprastraktura at pag-akit ng mga mamumuhunan para sa mga proyektong nuklear.

Natapos na rin ang feasibility study ng Bataan Nuclear Power Plant (BNPP) sa tulong ng South Korea. Bukod sa Bataan, pinag-aaralan din ang Palawan, Masbate, Pangasinan, at Camarines Norte bilang mga posibleng lokasyon ng mga susunod na nuclear power plant.

Ayon naman kay National Power Corporation (NAPOCOR) President at CEO Jericho Jonas Nograles, handa ang ahensya na magsagawa ng pagsasanay para sa mga Pilipinong manggagawa na maaaring mangasiwa sa mga nuclear facility sa hinaharap.

Binigyang-diin ni Nograles na mahalagang maagang ihanda ang mga kinakailangang tauhan at eksperto upang matiyak na magiging ligtas, maayos, at responsable ang pagpapatupad ng nuclear energy program sa bansa kapag ito ay tuluyang isinakatuparan. #RPB

Source: PNA