MAYNILA — Kasalukuyang sinusuri ng Department of Justice (DOJ) ang mga dokumentong isinumite ng pamahalaan ng Estados Unidos kaugnay ng kahilingan nitong ipa-extradite si Kingdom of Jesus Christ (KOJC) founder Pastor Apollo Quiboloy at dalawa pang matataas na opisyal ng relihiyosong grupo.
Ayon kay State Counsel Dennis Arvin Chan, binubusisi ng DOJ ang anim na batch ng mga dokumentong ipinadala sa pamamagitan ng Department of Foreign Affairs (DFA) bilang bahagi ng proseso ng pagrepaso sa kahilingan ng US government.
Bukod kay Quiboloy, kabilang sa extradition request sina Teresita Tolibas Dandan at Helen Panilag, na kapwa dating mataas na opisyal ng KOJC at kabilang sa mga indibidwal na hinahanap ng Federal Bureau of Investigation (FBI).
Batay sa isinampang superseding indictment ng US Department of Justice, iniuugnay ang tatlo sa umano’y mga paglabag kabilang ang sex trafficking, pandaraya sa pangangalap ng pondo, visa fraud, at marriage fraud na may kaugnayan sa operasyon ng KOJC sa Estados Unidos.
Sa ilalim ng Extradition Treaty ng Pilipinas at Estados Unidos, kailangang tiyakin ng DOJ na ang mga kasong isinampa ay may katumbas na paglabag sa batas ng Pilipinas at na hindi haharap ang mga respondent sa parusang kamatayan bago ihain ang kahilingan sa isang Regional Trial Court.
Source: The Manila Times
Discover more from Rexpress Balita
Subscribe to get the latest posts sent to your email.
Leave a Reply